По предположениям автор этих стихов Хафиз Хаджи из селения Губден был незрячим человеком. Здесь приведены некоторые даты, когда были написаны эти стихи. Это 1886, 1901. Возможно если поинтересоваться есть более точные сведения о этом благословенном человеке.

Здесь приведена только часть его стихов. О чем эта книга? Если отвечать коротко это изложенные в стихах факты из корана, есть также стихи о людях современниках и проблемах волновавщих автора. Но говорить о силе и вдохновении с каким написаны эти невожно, понять это может только прочитавший.

В детстве и в школьные годы я обрашал внимание на пожилых людей глаза которых были влажные от слез, когда они читали мавлиды стихи корана и другие книги. Только научившись читать и понимать эти книги я понял, что иначе читать эти книги не возможно. Совершенно необъяснимо то что чувства, которые испытываешь при чтении не зависят от многократности чтения. Каждый раз их читаешь как-бы заново. Воистину, слепой Хафиз Хаджи из селения Губден был величайшим поэтом:

"Лью слезы на твоем пути, чтоб не в пыли тебе идти, -
Готов ресницами мести я пыль с утра и до утра".


***

Ца бари нешизе гъайиб ГIисани
Фана дунья балтехIе иб нушани
Гъариб мела тIягIат бирехIе ибни
КебяхI ахъиб лубиаила дубуралике


Гьар дуе суждалике дуркIи гIемру
Гьар бари дуббурцуле букIиб шукру
Лимзилизе буциле тасбихI зикру
Даим буб Аллагьис гIибадатизе


Зубрела маркала шини бужуле
Ганзала гьар турлу къарни букуле
Галгбела кIапIрела палтурт киркIуле
Яшади буб ила хулал замайзе


ГIур дерхIе вакIиб къадала кьарбарес
БерхIехъ нешла дубуцар бархьаахъес
Ца адам вакIиб Марьямичу гъайэс
ДяхIке изуб салам гиб марьямизе


КеибхIеле пяхIяр руб урух ригиле
Руржес ряхIиб уркIи кIантIи бакIиле
ХIяйрамле гъайиб хIу че сайре иле
КехIеибил хIекибил гIемрулизе


Хъулре хараб диран хIебре далдиран
Дигант ахIергьуб хьунул дикIар биран
ГIязизте дерхIне ятим цIуръа биран
Жан айсан гIизраилра иб сунезе


ИштIал сай иле гIемруни хIелкъунил
Дунъяла хIясрат сай мурад хIебубил
Цакъил пачахI сай иле мас имцIайил
ДяхI хIедиран сайра иб ца мугьлатла


Мурадни хIеакъиле гьар убкIахъан
Цала къайгъи цализе чIям бирахъан
Дунъяла гьар нигIмат лазат дулхъахъан
Гьарил урхахъанилра иб ганзализе


Марьямни иб хIу сес вакIаде дичу ?
Ну вашуйра цацле гьар инсайчу
Гьана ил ерга баахъиле хIечу
ВакIира хIела жан асес иш хIяйзе


Агь иле тIама гIягIбяхъиб Марьямни
ХIяйран рариб бебкIала цIакъ хабарни
ХIулбе биса заб ана тIутIу дарибни
ДерхIе кеес хIеръиб авъалра шейке


Дила хIулбела шала мурад хIясрат
Дила уркIила хIели чархла кьуват
ДерхIе чарухъайкем га бирис мугьлат
Мугьлат бара хIеиб Аллагьни дизе


Мугьлат хIегиле жан асиб ил хIайзе
ДерхIе вакIиб кадихьнила аргъизе
Неш кераиб карихьа михIрабизе
РебкIни хIебагьуб сажес иб гьантIизе


Неш ратуле гIибадатизе ерхуб
Цуг дуела замана бухIна берхуб
ГIур вевъиле нешике ахъуерхуб
ХIу сен рууйре иб гъапулдешизе


УркIи бургIяб жаваб хIегиле нешни
Исуле кьакьа вакIиб пашмандешни
Рахле гьантI муръил замана бурар ибни
Ратуле гIурра ерхуб тIягIятизе


Савла дуе гIурра вевъиб неш иле
Муъминт саби тIагIатике бизуле
ХIу русуле дубуцар бархьхIеиле
Рууйрев иб, жаваб хIегиб сунезе


Акбаа дехIибаа замана баиб
Исуле нешла дяхIике дяхI дихьиб
Нешла кIелра хIули мухIли пIайдариб
Хъябруцика гъячIрариб михъирлизе


Зубрела малайкуне зигар бухъун
ПяхIяр буле дубура гьакIарбухъун
Жиндре жаниварте дисуле гъайдухъун
Вев укIулре рухI агар хамхализе


Якьин бубхIеле неш ребкIнила хабар
ЦIакьле исайиб гIягIбяхъиле зар-зар
Сунеке дисес дяхIиб гьар жанивар
Сабур бара иле Аллагьла гьуйзе


Шалай дунъя гьана дике цIябубдеш
Дике бакIиб мусибатла хуладеш
Гъариб мелике, неш, агь дила цайкъдеш
Гьана дила хIяйрандеш айш мелизе


Жавраил Микаил бакIиб хIеб биркъес
ХIурилгIянте бакIиб шараб шини рирцес
Гьалжаа халгIят кадухиб кIапруцес
Ралрариб сакин рариб абад хъяйзе


ТIама дариб хIебизе сен раде неш
ГIизраилизекан бубу урухдеш
ХIел битIнила чархизела кьутIкъудеш
Гьанара леб дила урши ишхIяйзе


Марьям неш рерхуб цIудар гIянжилизе
ГIиса идбаг калъун хIяйрандешизе
Исуле цIакъле дубурлабекIизе
Аллагьни гIур ахъуциб зубрезе


Бара Аллагь ХIяпиз ХIежила мурад
Ибну Губдени ХIежила МухIемад
ШафагIат вара чус ХIябиб МухIемад
Эмин вара саби кIелра хъайзе


***


Аллагьни амру бариб муэлизе
ДерхІе ельгье иле Ибрагьимизе
Кьабул икиб елгьес ил сягІятизе
Багьуле Аллагьла амрула хІекьдеш



ИсмагІил валвара иб гьажарлизе
Валвариле нешни гъячІвариб кайзе
ГІурра ил неш пІайрикун кІелра хІуйзе
ХІуре иле нам дунъяла жагадеш



ДерхІе елгьес иле ада ватихьиб
Нешизе хабар бурес иблис бакІиб
хІерхІеиле гІур дерхІеличу бакІиб
ДерхІенира бариб илис мяхІрумдеш



Адани дерхІела куц хІисаб бариб
ХъумхІертес иле сай уркІила уциб
ХІулбела биса цІакьле тІутІу дариб
Пикри бариле дерхІела язихъдеш



Ца мела халват бикиб адам агар
ДерхІелизера буриб бебкІала хабар
Дила нешизекан икайкем декІар
Сен хІебагьахъаде я дила дудеш



Аллагьни дике хъарбариб хІу елгьахъес
ХІу севкІудал бура гІазизте жан гес
ХІела хиял лебхъяй ну къурбан елгьес
Сен хІебураде нешла мякьла бархъдеш



Ил дила нешин хІезе хьарбаале
ХІулбела шала дерхІе севба але
Дунъяла жагадеш сеуба але
нешизе се жаваб лугада дудеш



Нугъунте дерхІнела урга хІеръадле
Дила гьалмагъ дерхІне кебаадле
Илдичал варх цехІна ну кехІеасле
ХІушаб хІебесу ил мела мяхІрумдеш



Хула бари дехІне саби аднени
Балбируле букІре лугІуле чуни
Дила къакъари луулере хІуни
ГІела хъянтализе байкем я дудеш



Аднени дерхІне хІулбиргахъуй бари
Жагате палтурте киркІахъуй бари
Пашман ирурав балъа кьакьари
Бержахъа дизе бебкІала кьутІкьудеш



Ну къурбайс елгьасле я дила ада
Кидил махлукьатис дила диъ бултІада
Дила чархла диъ гьизе букахъада
Адамла диъ беркес хІярамхъяй дудеш



ДерхІне балбируле саби аднени
Чула дяхІ-някъ ицуле замзам шини
ХІуни уцулра хІинтана хІини
Я дудеш ишбари намил хІяйрандеш



Дике ряхІму биру урцуте жани
Ганзализекан дашуте микъяни
Урхьнезела касане балихъмени
ХІуни ряхІму хІебириду я дудеш



УрчΙемал базни нешни кайзе уцира
КІел дус мама гиле някъя уцира
НухІялал ватахъес нешизе бура
Дила цІакьле саламра бура дудеш



Дила нешла мякьла хІу чарухъадле
Дила хІева савгъатле арбухадле
ХІинтан хІини гъудулле кебаалле
Ну хъумартишав язихъ хІересу неш



Ну кьуватле жагьилте гІемрулизе
ХІу зягІифле ухъна хула дешизе
Гъудур укІасле ну гІязизте жайзе
Някхбе кьяшбе дигьа я дила дудеш



Ибрагьим Халилни херъиб зубрезе
ХІулбела биса чяхІдухъун муснезе
ХІяйран уле ИсмягІилла дугьбеза
Кьакьадешизе икиб гъариб дудеш



Гьанна дила къакъла лигбе дячаде
ХІуни дила уркІира пІякьбушаде
Исахъуле хІулбе загІип дараде
Гьана биур лехІехъе дила урши



ДерхІени иб гьанна хІед дигуй бирис
Дила гІязизте жан хІет къурбан дирис
ХІу багьандан жан гес ахІерхІедирис
Ил амрулике сабур бирис дудеш



ГІур кьибла шейке удивяхъиб елгьес
ЕрхІцІайна хІекбариб хІевуб атІахъес
ДяхІла хІермавкІу, къуз бара иб кІинес
Къуз барибкъяй хІетІун хІяйран уб дудеш



ГІур къаркъалике бяхъиб, кІел кьехІбариб
Къаркъа лууй диъ сен хІелууйре иб
Дисни гъайиб, Аллагьни малуа иб
Сен бариша Аллагьике гІясидеш



Ибрагьимни ил елгьес къайгъибариб
ИсмягІилни уркІира халис бариб
Аллагьла шейзекан гІур тІама дариб
Гьанна багьура иле хІела мардеш



Дудеш дерхІени муэри марбариб
Аллагьни чуке ряхІму хьурабариб
Къурбан гиле белгьес дерхІе ерцахъиб
ХІебержахъун цІакь бебкІала кьутІкьудеш



ХІяпиз ХІежи гІязаб маркІи хІебизе
Кемалкьада жагьаннамла цІализе
Сакин вара Аллагь гьалжанализе
Лугътеке хІела ряхІмула хуладеш



***



МяхΙшарлике Аллагьни хΙукму биру
Гунагькарт халкь цΙализе сакин биру
ХΙямим закьумни бужан дарг кьехΙдиру
КиркΙахъу кьатран бургу гΙязабизе


Азир дусни Я хΙаннан, Я маннан букΙар
Азир дусни Я хΙяййу, Я кьаййум
Азир дусни Я рахΙман Я рахΙим букΙар
РяхΙму бараиле булган РяхΙмайзе


Азир азир дусни урга лехΙихъур
Дерцише иле барахΙеле сабур
Зигар сабур пайда агале бисур
Цаан гΙязаб буркΙуле гьарзамайзе


ГΙур Аллагь вягΙян укΙар Жибрилизе
Гунагькарт уммат кебаэс цΙализе
ВакΙиле хΙял хьарбиу малайкизе
ВойхΙяйке леб укΙар цΙакь гΙязабизе


Жабраил кеибхΙе саби шадбурар
ГΙязабла малайк гΙехΙена иш букΙар
Дерцахъише иле саби хьулбукΙар
Ил вагьес хьарбиу ца малайкизе


Малайк укΙар Жабраил сай иш иле
ХΙябиб МухΙеммадла гьалмагъ сай иле
МухΙеммад гьанушибхΙеле бисуле
ВавбукΙар ва вайлагь букΙар Расуйзе


Я МухΙеммад иле саби гΙягΙбукΙар
ЦΙализекан халис дараба букΙар
ШафагΙят буле дерцахъаба букΙар
Язихъле сажа Аман мадат хΙезе


Чурхре дигуле цΙудардуле сари
Диъбе дарцΙиле тΙутΙудуле сари
Някбе кьяшмеке шинжир бугъав сари
Мадалтаба хΙябиб букΙар цΙализе


ГΙур Жабраилизе саби га букΙар
Расуйзе нушала хΙял бура букΙар
Нушала язихъдеш багьахъа букΙар
Нуша хъумартулрени гΙязабизе


РяхΙмайчу исуле Жабраил ляван
Гунагь карт уммат сенре укΙар РахΙман
Игулре укΙар цΙударбуле гаан
Расуйчу хабар баахъа иб дизе


Расуйчу исуле Жибрил гьайурар
ТΙубала галгила уди сай урар
Жабраил кеибхΙеле Расул укΙар
ХΙу сейс исуйре узи бура дизе


Нуниан умматла хΙял багьадлекΙан
ХΙу гΙяхΙле исаде укΙар дикеман
Уммат гΙягΙбукΙулере цΙализекан
Дерцахъаба аман букΙулере хΙезе


Расул цΙакьле зарзарбяхъиле исур
ГΙур умматла вавла тΙамала бикьур
Лаббайк я дила уммат иле каркур
Тахизекан хьураурцар ил хΙяйзе


ГΙяршла гьади сай вакΙиле исуле
Суждалике каркур таж убасиле
Дурхъате дяхΙ ганзалике дихьиле
Уммат халис бара укΙар РяхΙмайзе


ВягΙда бараде укΙар Аллагьизе
Дила уммат кехΙебекьес цΙализе
Аллагь укΙар кебикьура цΙализе
Нуша хъумартубхΙеле дуньялизе



Гьана шафагΙят е укΙар Расуйзе
ХΙела уммат арбука барх гьалжайзе
ГΙур вакΙиле Расул жагьанимзе
Уммат халис биру арку гьалжайзе


ХΙявзла шарабизе чурхре дирциле
ЕцΙну шурала баз ан нурла буле
Дурхъате нурла халгΙят киркΙахъуле
Абад сакин биру ил нигΙматизе


ХΙяфиз хΙежис насиб бара шафагΙят
Ризкьи дара гьалжаа шараб нигΙмат
Кьадар бара хΙурулъгΙинт нурла халгΙят
Сакинра вара Аллагь кьусуртезе.



***

Жагьанамизе лагъ гΙязаб уркΙуле
АвцΙали азир дус сай гΙягΙукΙуле
Я хΙаннан, Я маннан иле букΙуле
Жабраилни тΙама бикьу ил лагъла


РяхΙмайзе лагъ валад укΙар Жабраил
ГΙязаб уркΙуй ХΙябибла уммат сайил
ХΙябибис гΙяхΙдеш барес нам дигуил
КΙецдеш багьандан нушала ургала


Жабраилни РяхΙман лис сужда биру
ЦΙализекан лагъ ерцахъес га биру
Аллагьни ил ерцахъес пурван биру
ГΙур ляван къапу лике жагьанамла


Жабраил укΙар цΙала Малайкизе
Аллагь малта укΙиб ил лагъ цΙализе
Дураерхахъурле ил иха дизе
АвцΙали азир дус сайни язихъле


Азир дус Малайк цΙализе хΙерукΙар
Адамте бигуле цΙударле бургар
МухΙе къаркъбекем мешудуле дургар
Жагьанам лагьбукΙуле дахъ бенжуле


Малайк укΙар кΙинайс Жабраилизе
Нуни ил лагъ варгес хΙеврус цΙализе
Гьар шейъ дигуле дарсдуле сунезе
Аллагьни гьинкΙа лагъла мер хΙебала


Жабраил каркур суждалике гΙурра
Азир дус унцΙуле ил лагъ хΙергира
Бура хΙуни гьинкΙа мер балуй агара
Аллагь укΙар хΙеръа пулан кьадала


ГΙурра унцΙес гΙяран Малайк цΙализе
Жагьанамла кьадала ца къямзизе
Дебъабариле цΙала табутизе
Лагъ урар исуле бекΙ къуркъбуциле


Гьалак вариле сай цΙакь гΙязабни
Кькьавариле чΙичΙа кьякьрабтени
Дебъабариле шинжир бугъавтени
Лагъ ургу игуле гаан цΙударле


Малайкни уциле ил лагъ шиш иру
Ахъула чΙичΙа кьякьраб тΙутΙудиру
Дихьибте шинжир бугъав декΙардиру
Лагъ гьайиру малайкни някъ буциле


Лагъ укΙар аркуйрав ну хусар варес
Яра аркуйрав гΙурра гΙязаб цΙакь барес
ХΙу аркуйре Жабраилизе едкес
Аллагьла гьади арукес дигуле


Лагъ укΙар Аллагьла гьади макаба
СягΙирси кьарлизе ну лейвакΙаба
КΙел утΙиле ила гΙязаб еркΙаба
ДяхΙ агара гьади вакΙес Аллагьла


ГΙемал агара укΙар хΙу хΙевкиле
Жабраил гΙяран ил лагъ арукиле
Аллагьла гьади кΙачΙилзан урузле
БиркΙант руржуле майа чяхΙдукΙуле


Аллагь укΙар Расул хΙекΙибу хΙечу
Дила кьуръан хΙебаибу хΙушачу
Сен вакΙаде гунагьунечал дичу
Дила амру нагьи дархь хΙедариле


ХΙела кьуръайчал вакΙиб Расулуллагь
Чарх шейтΙан ахъудуб барира гунагь
ХΙурмат бара ахъбара цΙала балагь
Авцιали азир дус хΙезе улгнила


Аллагь кеерхуле лагъ иру хасар
Гьанна гьалжайзе арукая укΙар
Намра гьалжайзе мер лебу лагъ укΙар
ЙерхΙела дунья цамер леб укΙар хΙела


Кавсарлизе чарх бирциле умъахъу
ЕцΙну шура баз ан нурла урахъу
Гьалжайзе хΙябибличу иахъу
Ахир ил Жабраил шафагΙят уле


ГΙябдул гΙязизни иш барни га бариб
ХΙяфиз ХΙежини барес кьабулбариб
Къурбаа хула дуе таманбариб
Азирлим хΙябдаршлим ецΙну аврала



1896 ибил урус тарихла дус



Жан асес Израил вакΙиле рахле
Дигантезекан хΙу декΙар вариле
ДерхΙне рурсбе мас мулк гΙелаб батуле
Жан хΙясратле убкΙанил лебга темаша



Палтарла елтΙа кайзе уциле
ЧархΙелхъуй сапар ерхес вал уциле
Урцуа урчилике ахъуциле
ЦΙябил хΙере Арханил лебга темаша



Мас имцΙайре иле пахру биранил
Куц жагайре иле къуга уранил
Узи уршиличал кебяхΙ уранил
Израил чар хΙейранил лебга темаша



Урчи халчукичал пахру биранте
Дурхъате халгΙятла палтурт киркΙанте
Ахъте хъулре дариле кабиръанте
Кьакьай хΙебизе кабилхьан лебга темаша



Мункар Накирла цΙакь суал бируле
Жаваб хΙегадле кьякьни пяхъ букΙуле
ХΙебни гъячΙвариле кьакьа вариле
ХΙебизе гΙязаб уркΙан лебга темаша



БиркΙант тΙутΙудуле декΙар диркуле
Милкъне, жанивартни хамха бугуле
ЧΙичΙа кьякьрабт нудбе ахъу дакΙиле
ЦΙудар хΙулбе дужанил лебга темаша



ХΙулмавкΙаб якьинле убкΙуй баланил
Шад уб маваб цΙябил хΙере калхьанил
ГΙянжи уле фанале етихъанил
Дунъя буцес хъямукΙан лебга темаша



Дунъяла ахир замана бубхΙеле
Гьар мицΙирил халкь бебкΙахъибхΙеле
Исрапил малайкни гΙягΙ бахъибхΙеле
ЧΙянкΙуле алзанил лебга темаша



ГΙянжила пяхΙяруле айзубхΙеле
ХΙулбе дяхΙ хΙяшдариле хΙеръибхΙеле
Неш дерхΙе ил мела къаршибубхΙеле
Ца ница хΙебанил лебга темаша



Вайте гΙяхΙтела табтурт делчΙес гиле
МухΙлумеке мугьур пичат дяхъиле
Някъбе кьяшме гъайдухъа бикьри дуле
Гьар гунагь ашкар биран лебга темаша



Аллагьни мизан унцант дихьахъиле
Гьар инсан жинд малайк цяхΙнабяхъиле
Буциле бекΙла мухΙе руржахъуле
ГΙемулте дидикΙанил лебга темаша



ХΙябал азир дусла сиратΙ ихъуле
ЕрхΙел мерла хΙисаб суал айсуле
Удикан аждагьуне хъямдукΙуле
СиратΙ гуми ихъанил лебга темаша



ИлатΙан ерцибил арху гьалжайзе
ХΙерцибил лейикΙу жагьанамизе
Дебъавариле шинжир бугъавтезе
Абад гΙязаб уркΙанил лебга темаша



ХΙекьте сари ХΙяпиз ХΙежила ибте
Кьуръайзе чула баян гьандушибте
МяхΙшар базарлизе бацΙле бакΙибте
МяхΙрумбуле кулъанил лебга темаша



***

Дунъяла гΙелала бари баиле
Ахиратла гьадила аргъ баиле
Абад чарх хΙелхъуй сафарла урхухΙеле
Дахъ язихъ майраба аман Израил



Аллагьла амруличал хьурауле
ГΙязизте жан асес мякьла кецуле
Кьуватичал цΙакьле жан дидикΙуле
Дахъ язихъ майраба аман Израил



АхΙерле бикьуб мас дугΙ кабатуле
Дигант бисахъуле гΙела батуле
АркухΙеле шалай дунъя батуле
Дахъ язихъ майраба аман Израил



ХΙел битΙнила цΙакьдеш бихес хΙевруле
БебкΙала кьуткьудеш балхес хΙевруле
ГΙязизте жайзе гъудур укΙухΙеле
Дахъ язихъ майраба аман Израил



Гьан икадле гьар жанла уркΙилике
Урехини руржебиур чархике
ИхьибхΙеле жан айсуле къакъике
Дахъ язихъ майраба аман Израил



ЦΙакьил залим пачяхΙ талхъан хΙелтулре
Дурхъай гΙялим вали загьид хΙелтулре
Гьар жанла рухΙ асес ахъу катулре
Дахъ язихъ майраба аман Израил



Жан дидикΙуле туме удахъуле
РухΙ гъячΙдариле лигбе дицΙахъуле
Чархла диъбе кябдируле удуле
Дахъ язихъ майраба аман Израил



УркΙила ниятике хΙейахъуле
ГΙямруни елкъайкем дехъе хΙелтуле
Жан айсулехΙеле хархар укΙахъуле
Дахъ язихъ майраба аман Израил



Бурхани вякь аиле хΙер укΙуле
ХΙясратле гΙязизил дунъя булхъуле
УбкΙухΙеле мухΙли аъбукΙахъуле
Дахъ язихъ майраба аман Израил



БебкΙала ахъула умягΙ бужуле
ХΙеа майъализе гъудурукΙуле
Ерхес жан макьамике ваибхΙеле
Дахъ язихъ майраба аман Израил



Дигант алав бисуле вевбукΙуле
Мез буциле гъайэс ахъри агале
Дуресте гΙела калъа урхухΙеле
Дахъ язихъ майраба аман Израил



АвцΙайна кам архъниликем гΙядабил
Расичал кΙел ерчниликем къийинил
Бужуй васле ил хΙял битΙни кьутΙкьуйил
Дахъ язихъ майраба аман Израил



Аллагь гьар шай гьамадбара гΙядабил
ХΙял битΙнила цΙакьдеш малуга декΙил
Ахир имайчал бебкΙа га шагьидил
Дахъ язихъ майраба аман Израил



ХΙяфиз ХΙежи сай дугΙя бируле
Кьабулил жаваб га аллагьуль жалил
Кеерхе би-хΙякькъи Ибрагьим халил
Дахъ язихъ майраба аман Израил



Азирлим хΙябдаршлим ецΙну урчΙемра
Ил дус жамад аввализе барира
Гьар иш бучΙуйке дугΙя хъарбарира
ХΙяфиз ХΙежис ряхΙму булгея иле



1900 ибил нушала тарихла дус



Дунъя бурцуле дин фасад бируле
БатΙулил дунъяла масис узуле
Бируй гΙемал дунъя гьанне бируле
Дунъя бухъа убкΙуй хабар агарав



Гьалжайке хьул укΙуд гΙемал агале
ЦΙализекан ерцес къайгъи агале
ХΙярам хΙялалике беги агале
Жагьаннамла гΙязаб хабар агарав



Мас бикьуле варисунес батуле
Етимле дерхΙне гΙела кабатуле
Ахъте хъулре дариле кадатуле
ЦΙябил хΙере калхьуй хабар агарав



БебкΙала изайни гьалакбируле
Дигант вев букΙуле гъай эс хΙевруле
МухΙли аъбукΙуле хархар букΙуле
ГΙязизте жан айсуй хабар агарав



ЧΙянкΙу вариле урхьуйке ихьиле
Урузил чарх халкьла гьади бихьиле
УрхΙла някъбе хΙеке халтΙ дукΙахъуле
ХΙела хамха ицуй хабар агарав



Абад чар хΙелхъуй сафарни ерхуле
ЦΙябил хΙебла хΙалтΙизе хΙу ихьиле
ХΙет гьади гΙямба уркьле кΙачΙ датуле
ЦΙудар гΙянжи иртΙуй хабар агарав



ХΙу мицΙир вариле суал бируле
Жаваб хΙегадле кьякьни пяхъ букΙуле
ХΙебни гъячΙвариле кьакьа вариле
Бургъунт даца дургуй хабар агарав



ЦΙуба кафан дерхΙиле тΙутΙудируле
ЧΙичΙа кьякьраб милкъяни хΙу укуле
ХΙуни бикьур масни гΙелабт букуле
Чуни хΙу хъум иртуй хабар агарав



ЦΙудара хΙулбе милкъяни дужуле
ХΙела цулбе чархла диъ кадиркуле
Чархла биркΙант цацле декΙар диркуле
ГΙянжи фана уруй ххабар агарав



Исрафилни цΙакьил тΙамадариле
МяхΙшарлике мицΙирчΙянкΙле авциле
Мизантеке хΙела гΙемулт унциле
ДигΙянт ашкар дируй хабар агарав



БуцΙардешни бекΙла мухΙе руржуле
Вайте гΙяхΙтела табтурте дучΙуле
Аллагьла гьади биркΙанте руржуле
ЧΙянкΙуле кΙачΙ илзуй хабар агарав



ХΙябал азир дусла гьуйке вашуле
Тулла бяхΙ ан букΙуй гуми ихъуле
ЦΙа лагьбукΙуле чΙичΙне хъямдукΙуле
СиратΙ гуми ихъуй хабар агарав



ГΙялам халкь кΙибехΙел тамунбариле
ЦабехΙ гьалжунтезе шукру букΙуле
ЦабехΙ жагьанамизе гΙязаб буркΙуле
Ва вайлагьу букΙуй хабар агарав



ХΙяфиз ХΙежи халкьис насихΙят балад
ХΙела чархис гΙяхΙбай барес хΙебалад
ГΙурхΙис гъайукΙуле хΙет бесу мадат
ХΙеке ерга биуй хабар агарав



***



Ахир замман баиле гΙялам вой буб
Куц инсанте биуле саби шейтΙант буб
Лимзне муръите уркΙбе хилапте буб
Ахир заман баиб Я Расул Аллагь



ГΙялимтела вягΙза хΙекьле хΙебуциб
Иблис шейтΙанла гьуни цΙакьле буциб
Дежис тамбакулис хΙялал мас бициб
Ахир заман баиб Я Расул Аллагь



ГΙалимла гΙилмула кьадри кеберхуб
ХΙадис каламизебил гΙемал бехъуб
Муъминт убахΙ буле залимт кебахΙ буб
Ахир заман баиб Я Расул Аллагь



ДехΙеба дуббуцализе фасадле
Цалике ца гъай букΙуле хΙасадле
Динла агьлулике бугьуле зидле
Ахир заман баиб Я Расул Аллагь



БиштΙатΙе дерхΙне йузукьара буле
Жагьилте зулмукарте кьулкне буле
Хулате макру хΙилала халкъ буле
Ахир заман баиб Я Расул Аллагь



Гьар санигΙят гΙемултечал бируле
Вачарлизе къяна шилтΙакь дируле
Амманатис дахъ хиянат буруле
Ахир заман баиб Я Расул Аллагь



ДерхΙнени неш дудешла амру батуб
Къарши гъайбукΙуле хΙурмат кабатуб
Хьунре кьяли буциб хΙекьил батуб
Ахир заман баиб Я Расул Аллагь



Хьунре амарсулела ахъу буле
Барс гъайбукΙуле чус дигант бируле
Турлу турлу рангла палтурт киркуΙуле
Ахир заман баиб Я Расул Аллагь



Хьунрени гьуйке гимайте дируле
Къибат бугьтан къяна гъайни бугьуле
Инсап хΙяйаъ бердиле дахъ пучбуле
Ахир заман баиб Я Расул Аллагь



Узбе рузбела урга диги бехъуб
Узи уршила духΙна хΙурмат бегъуб
Цалис бубиллике цабехΙ хΙясад буб
Ахир заман баиб Я Расул Аллагь



Давлакебтезе сахаватдеш дегъуб
МискΙин пакьиртезе дахъ сабур бегъуб
БултΙуй секΙайке хъямбукΙуле цΙах буб
Ахир заман баиб Я Расул Аллагь



ГΙялимтезе гΙемал шаригΙят бегъуб
Ахъула бекΙ гΙурхΙизе гΙядлу бегъуб
ДяхΙис рушбатис гъайбукΙант бетагьуб
Ахир заман баиб Я Расул Аллагь



ХΙекьил дигΙям бариб батΙулил буциб
Залимла зулму чуни ахъбуциб
Зулмукарте вайтела кьяли буциб
Ахир заман баиб Я Расул Аллагь



ШаригΙят батуле дуциб закумте
ГΙялам турлу буле дарсдуб замунте
ГΙялимте бегъуле калъун жагьилте
Ахир заман баиб Я Расул Аллагь



Гьар гΙялам халкь масла къайгъилизе буб
Бузара имцΙабуб баракат камбуб
Аллагьике хΙекьле тавикаль хΙебуб
Ахир заман баиб Я Расул Аллагь



Дин ислам хараб буб батуб шаргΙ суннат
ТΙягΙятизе хΙеберкиΙиб гьеч хΙялават
Риба букуле уркΙбе дуб кьасават
Ахир заман баиб Я Расул Аллагь



ХΙяфиз хΙежис Аллагьни тавфикь бариб
ХΙядис бурес уркΙила илгьам бариб
Дуресте лерхъяй гъай аркъа хΙедариб
Ахир заман баиб Я Расул Аллагь



***



Пикри ухъе мимискΙин дунъяла ххΙяйке
Чумил алхуна гΙяшикьле сунеке
Жан хΙясратле бикьубил мас мулкике
ЦΙябил хΙере берхуб дунъя батубни.



ХΙу урхуд абад чар хΙелхъуй сафарни
Савгъат тΙалаб бара пашман урудни
ХΙет пайда хΙебиру масни дерхΙнени
Пайда бируй гΙемал хΙейсиду хΙуни



Ажайни уциле бурушла калхьад
ГΙязис жан калъахъес дарман хΙебалад
СягΙидрев шакьирев ил мар хΙебалад
ИргΙяйкилре нафсни гьава шейтΙайни



Динлизе фасадле гъапулле ууд
Ца Аллагь гъапуру-рряхΙим сай укΙуд
ГΙемал агале гьалжайке хьулукΙуд
ХΙебалулрев хΙела уммут дугΙ бурни



Лерил гΙемру дунъя гьанле деркΙадле
Абад хъайс гΙемал тΙалаб хΙебарадле
РяхΙман Аллагь гьим игиле варгадле
ХΙяйран варише цΙакь гΙязабтени



Даршал азирлим гъану авра азир
Идбагуне калхΙелъун дунъялизир
ХΙеч хΙебатуб цΙакьил пачяхΙ дурхъай вазир
ХΙеахъиб цалра уркΙила мурадли.



ХΙебатуб дурхъате Расул асхΙябте
Кидаба залимте цΙакьте талхъунте
Пикри бара Намруд ГΙад ФиргΙяванте
ХΙебатуле буциб цΙудар гΙянжини



Азир дус гΙемру гибил НухΙ ватхΙетуб
Дунъяла пачяхΙ Зулкьаранай хΙетуб
Дунъя мулк барибил Сулайман хΙетуб
ГΙуждажал батубу намарт дунъяни



Ахир намарт дунъяра хараб биру
ЕрхΙдехΙ зубре муснера фанадиру
Жан айсан израилра фана иру
АллагьикΙан кухΙелъуй балад хΙуни



Дунъяни гΙялам гьалакбариб хΙябра
Гьеч хΙетуб идбаг асхΙяб вали цалра
Фана бариб гΙялам гΙябид загьидра
Шак мавкΙуда хΙеке ерга биурни



Камил дунъялизе лазат айсанте
Турлу турлу рангла палтурт киркΙанте
Куллю дунъя мас мулк дила букΙанте
Буциб бебкΙала цΙакьил мусибатни



Куц жагайре иле къугъа биранте
Мас имΙайре иле пахру биранте
Насаб аслу имцΙатера букΙанте
ЦадехΙ гΙянжилизе берхуб алхуни



Милкъяни дугуле цΙудара хΙулбе
Кадиркуле исбагьи чархла диъбе
БиркΙанте тΙутΙудуле дерхΙиле лигбе
Илдис бубил эршидеш балад хΙуни



Аллагь ХΙяфиз ХΙежике ряхΙму бара
Сунела гьар гунагь хатΙа кΙапΙдара
Гьар гΙязабизекан сай аминвара
КΙелра хъайзе вархьвара Аллагь хΙуни



Ца азирлим хΙябдаршлим гъану хΙябра
Жамадул ахир базизе барира
МухΙеммад хΙежила ХΙяфиз ХΙежира
Ибну тΙаййиб ибну МухΙеммад сайра.



***



Дурхъай уммат бургуле тавратизе
БучΙухΙеле кебиуле сунезе
Муса идбаг гъайухъун Аллагьизе
Сунес бара иле ил дурхъай уммат



Гьачам шагьадат иле гΙемрулизе
Кебурхуте абад гьалжанализе
Илди уммат нам бара иб РяхΙмайзе
МухΙеммадла саби иб илди уммат



Лебил дунъя чус масжидле барибте
ДяхΙ шалале мяхΙшарле абурцуте
Някъбе кьяшме цΙубдуле нурла дубте
МухΙеммадла саби иб илди уммат



Аллагь багьандан гъазани жан гибте
Турме хъябике дяхъиле лябуте
ХΙисаб агале гьалжайзе гΙяруте
МухΙеммадла саби иб илди уммат



Дуе хΙере шел дехΙеба диранте
ЕрхΙдехΙ зубрела къапу гьаргдиранте
Ца Аллагьла ряхΙму хьурабиранте
МухΙеммадла саби иб илди уммат



Шагьру Рамазан базни дуббурцанте
Дусла духΙна дарибт гунагь ицанте
СиратΙизекан лямцΙ ана бурцанте
МухΙеммадла саби иб илди уммат



Дурхъай байтул ль-Лагьике хΙеж биранте
Лаббайк иле Аллагьизе букIанте
Гунагьунезекан хΙекьле умъанте
МухΙеммадла саби иб илди уммат



Беркайс гьади гΙела Аллагь гьануршант
Бисмиллагь алхΙямдулилагь букΙант
Гьар гунагьизекан Аллагь кеурхант
МухΙеммадла саби иб илди уммат



Кьурайзекан ца хΙярп белчΙале чуни
ЕцΙал гΙяхΙдеш лукΙуле чус Аллагьни
Га бариб нам уммат иле Мусани
МухΙеммадла саби иб илди уммат



Ца вайдешис цагьинкΙа лукΙхΙелукΙант
Ца гΙяхΙдешис къарши ерхΙдарш лукΙант
ГΙяхΙбай гьанбиркале музизе лукΙант
МухΙеммадла саби иб илди уммат



Мусани бургулра иб тавратизе
ХΙябал тамун лебкуте мяхΙшаризе
Сунес уммат бара иб Аллагьизе
МухΙеммад саби иб илди уммат



ХΙисаб агале гьалжайзе гΙяруте
ЦабехΙ хΙисаб суал камле айсуте
ЦабехΙ абад цΙализе хΙебалтуте
МухΙеммадла саби иб илди уммат



Муса идбагни Аллагьизе гъайиб
Лебил гΙяхΙдеш МухΙеммадис гилре иб
Лебил даража умматис гилре иб
Нура вараба мухΙеммадис уммат



Шукру укΙе иб Мусазе Аллагьни
Таврат гиле хΙура кавакадени
Нуни гъайиле дурхъа варадени
Рази уле буца хΙет гибил нигΙмат



ШукрудукΙея МухΙеммадла уммат
Гибнилике хΙушаб хулагил нигΙмат
Буршея МухΙеммадике салават
Буциле сунела суннат шаригΙят



ХΙяфиз ХΙежи цΙализекан ерцахъе
Аллагь хΙуни сай гьалжайзе керхахъе
Расул асхΙябт шафагΙятла бахъахъе
Амин вара мин агьвали ль-кьияма



***



ХΙябибуллагь дунъяни гьалак вариб
Зубре муснела агьлу хΙяйран бариб
Дунъяни инсан хΙелтни якьин бариб
Расул дунъяни гьалак варибхΙеле



Ил бари темашале гΙялам къагъ буб
Зубрезела малайкуне хΙяйран буб
АнцΙукьле буциле цΙакьле пашман буб
Расул дунъяни гьалак варибхΙеле



Хьунрени бучΙуле тΙама ахъбариб
ХΙулбела биса чуни тΙутΙудариб
УркΙурбезе лагьбукΙуле цΙа даргиб
Расул дунъяни гьалак варибхΙеле



ГΙумар асхΙяб гΙякьлулизекан ухъун
Расул ебкΙиб ибиллике кеулхъун
Ва-ЛЛагьи къяна саби иле хъя булхъун
Расул дунъяни гьалак варибхΙеле



Мез хъумартуле ГΙусман гΙела валкΙун
ГΙяли къагъуле гьеч секΙал хΙебалун
Лебте асхΙябте эсизекан бухъун
Расул дунъяни гьалак варибхΙеле



Абубакар агале кΙунес вакΙиб
Нурла дяхΙ гьаргдариле ахъу икиб
Исуле асхΙябтес насигΙят бедкиб
Расул дунъяни гьалак варибхΙеле



Лебте Расулт дунъяни гьалак бариб
Гьана МуххΙеммадике ерга баиб
Цалра инсайни дунъяла мулк хΙебариб
Расул дунъяни гьалак варибхΙеле



Кьакьадешизе уммат лейхΙебакΙиб
Даим чуке гъайукΙуле рух дедкиб
Сай ебкΙиле цΙакьил мусибат бакΙиб
Расул дунъяни гьалак варибхΙеле



Агьлу асхΙябте кьакьадешизе бикиб
ХΙябал бари Расул хΙебизе хΙейхьиб
КΙунес Мадинала мижитизе ихьиб
Расул дунъяни гьалак варибхΙеле



ГΙялини ирциле халтΙизе уциб
Зубре мусне цΙябдуле берхΙи буциб
Шалай бари дуела ан цΙяббариб
Расул дунъяни гьалак варибхΙеле



Авлахъизе жаниварте гΙягΙдукΙиб
Пашмеа дучΙуле чус къайгъи бикиб
Гьар гΙяламла уркΙурбезе цΙа лагьдукΙиб
Расул дунъяни гьалак варибхΙеле



Кьуръаа нур хΙебалекΙан халкьизе
Шаладеш кухΙелъун зубре муснезе
ЦΙябдеш кулъун мурталра дунъялизе
Расул дунъяни гьалак варибхΙеле



Идбаг ихьибте гΙянжи нурла дариб
Зубре мусне гΙяршикем дурхъа дариб
Лебте гьалжунтекеманра кебяхΙ бариб
Расул дунъяни гьалак варибхΙеле



ХΙебатуб ГΙумар ГΙусман Абубакар
Кидаба ХΙясан ХΙусен ГΙяли ХΙяйдар
Пикри бара ГΙяйшат Хадижат агар
КахΙелъа ПатΙиматра алхунхΙеле



Дунъяни гΙялам гьалак бариб хΙябра
ХΙетуле идбаг асхΙяб вали цалра
Фана бариб шагьид загьид гΙялимра
ХΙу се уше убкΙуд шакдеш хΙебуле



ХΙяфиз ХΙежизекан кеерхе Аллагь
Сунезекан ахъбара хатΙа балагь
ШафагΙятле вара ил ХΙябибулагь
Имайчал бебкΙа бара убкΙухΙле



***



Ца Аллагьла кьудратни акΙахъубил
Ада аба агале вакΙахъибил
Малайкунезе сужда барахъибил
Адам идбагра ерхуб ганзализе.



ГΙялам гъаркь бариле сай ерцахъибил
Шике аххъу гьаваника авуцибил
Шукру биран лагъ иле у бихьибил
Ил НухΙ идбагра ерхуб ганзализе.



Махлукьатла духΙнакан кавакибил
Дурхъай Аллагьни сай гьалмагъле варибил
ЦΙализе хΙейгахъуле ерцахъибил
Ил Ибрагьимра ерхуб ганзализе.



Адала амрулис мутΙигΙвакΙибил
ГΙазизте жан деткес кьабуликибил
Къурбайс елгьес шейке удивякъибил
Ил ИсмягΙилра ерхуб ганзализе



Баз берхΙи ана сай нурла варибил
Сай ан жагай дунъялике хΙекΙубил
Инсан гΙехΙена малайк сай букΙанил
Юсуп идбагра ерхуб ганзализе.



ЕцΙнуерхΙра дус изайзе икибил
Милкъяни диъ дерга лигбе калъунил
Балагьике цΙакьле сабур барибил
Аюб идбагра ерхуб ганзализе.



Сунела някъбезекан нур алкунил
ТΙури сайна дубурлике укибил
Таврат гиле Аллагьра гъайухъунил
Муса идбагра ерхуб ганзализе



Дунъя мулк бариле сай къунзухъунил
Машрикь магъриб зульматизе ваибил
Яъжуж маъжуж лисра бару барибил
Зулькьаранайра ерхуб ганзализе.



Нешла амрулис сай мутΙигΙвакΙибил
Расуллике гΙяшикьле хΙяйранъ убил
ГΙяшикьдешла цΙакьдешни гьалакубил
Вайсулькьаранайай ерхуб ганзализе.



Аллагьни тΙамала жагадеш гибил
Гьар жан лехΙихъуле хΙяйрандуранил
Дубурте дарх тасбихΙни дирахъанил
Давуд идбагра ерхуб ганзализе.



Дунъя мулк бариле дагΙра баркьубил
Базла гьуни хΙере байкем ихъанил
Жаниварте инсан жан мутигΙдубил
Сулайман идбаг ерхуб ганзализе.



ЕрхΙдехΙ зубрела ахъу арукибил
Жабраил катуле етахъикибил
Мякьла укиле Аллагь гъайухъунил
ХΙябиб МухΙеммад ерхуб ганзализе.



Идбагла дигуй гьалмагъ Абу-бакар
Дин ислам гΙядлу цΙакьдарибил ГΙумар
Калам цахΙна бяхъес ГΙусмайс гиб гьунар
ХΙябила дигант берхуб ганзализе.



Кафурт гьалакбиран Зулфикьар гибил
ЦΙакьил ХΙяйбаркъала хараб барибил
Алагьла арслан иле у бихьибил
АрслангΙялира ерхуб ганзализе.



Расул багьандан жан къурбан дарибте
Аллагь Расулла гьуни цΙакьбарибте
Дин Ислам туллижал кадизахъубте
Лебте асхΙябте берхуб ганзализе.



ЦΙакьте залимт Аллагь сажа букΙуте
Дунъя мулкбариле хазна бикΙубте
Намруд, ФиргΙяван, ГΙяд, Шаддад букΙанте
Дунъя буцибте берхуб ганзализе.



Пикри бара цΙакьте яра дурхъате
Дунъялике цаара хΙебатубте
Багье фана бурни Аллагь гΙехΙенте
Куллю гΙялам берхуб ганзализе.



БекΙдеш я мас мулк мампяхΙят хΙедуле
Узи урши агьлу пайда хΙебуле
ГΙязизте жан калъахъес бубхΙебуле
Пахрула агьлу берхуб ганзализе.



ХΙяпиз ХΙежи бебкΙа лябуйил балад
ГΙемал бара ибнуль ХΙежи МухΙеммад
ШафагΙят ес умут саби МухΙеммад
Балу бирхьанте берхуб ганзализе.



***



Лимзилизе бурцан даим зикрулагь
УркΙилизе хъумхΙертанил ца Аллагь
Гьар куллю шайъ лейдакΙибил сивалагь
Мубарак Ильяс устаз валиюлагь.



Ца Аллагьла амрулис мутигΙил лагъ
ХΙябиб МухΙеммадла сай варис ьалмагъ
Дагъистан шала бариб нурла чирагъ
Мубарак Ильяс устаз валиюлагь.



Машрикь магърибла урга машгьур убил
Сунна дурхъадеш халлкьис загьир дубил
Макка Мадинализе файз иртΙанил
Мубарак Ильяс устаз валиюлагь.



ГΙябидунела цΙакьле хулал гΙябид
Муршидунела хΙекьле камил муршид
Иахъанил даражалике мурид
Мубарак Ильяс устаз валиюлагь.



Гьар машаихунела шайих убил
Гьар валибела хулал вали убил
Гьар гΙялам халкь бихΙянил кьутбу убил
Мубарак Ильяс устаз валиюлагь.



Аллагьла нуранезе фана убил
Макьамуль гΙягΙлалике хьураубил
Аллагьичал мунажат хΙекь барибил
Мубарак Ильяс устаз валиюлагь.



Загьир батΙин кΙидехΙел гΙилму гибил
Аллагьла нурличал сай хΙерилзинил
Зубре муснела гьар шейъ даланил
Мубарак Ильяс устаз валиюлагь.





ГΙилмулизебил гΙямал биран гΙябид
Батуле фана дунъя убил загьид
Аллагьис хΙямд шукру биранил хΙямид
Мубарак Ильяс устаз валиюлагь.



Муридунес хулал баркат баибил
Муъмин халкьла уркΙбе нурла дарибил
УркΙбела зулмат фердавт урасибил
Мубарак Ильяс устаз валиюлагь.



Бурцанил Расулла суннат шаригΙят
Биранил Аллагьис халис гΙибадат
Дин исламике бархь биран махлукьат
Мубарак Ильяс устаз валиюлагь.



Гьар гΙялам халкьла духΙна убил загьир
Гьар куллю гΙилмулизе убил магьир
УркΙилизе бихΙянил кашпула сир
Мубарак Ильяс устаз валиюлагь.



ХΙела даражалике че ваэса?
ХΙела макьамике че хьура еса
ХΙет хΙямд дацΙа гьини атбаахъеса
Мубарак Ильяс устаз валиюлагь.



ХΙяпиз ХΙежике хΙеръа хΙела мурид
Мавла Я сейиди Я Ильяс муршид
ХΙеке хьул укΙуле ил пакьир ургид
Мубарак Ильяс устаз валиюлагь.



***



ДагъистΙайзе хьура буб хулал зульмат
Динла тΙал бургΙяб бакΙиле мусибат
БебкΙала изайни уциле фужъат
Ерхуб гΙялим гΙябид МухΙеммад Саид



Нурла чирагъ бяхΙиле Дагъистайзе
ГΙялам хΙяйранле калъун зулматизе
Баракат кахΙелун гьеч дунъялизе
Ерхуб гΙялим гΙябид МухΙеммад Саид



ГΙялим вали цΙудар гΙянжини уциб
Зубре мусне цΙябдуле берхΙи буциб
Шалай дунъя цΙакьил зульматни буциб
Ерхуб гΙялим гΙябид МухΙеммад Саид



МирзахΙежила сайре маъзун мурид
ХΙекьле етагьуб сай камилиль муршид
Дин исламла кадилзахъанил мужаддид
Ерхуб гΙялим гΙябид МухΙеммад Саид



Авлияъунечал бариле пикру
ГΙур магΙзун вариб ил ХΙежи Зубайру

…………………………………………

…………………………………………



Сайре ца гΙясрула сай ца фарид
Бархьбиранил гьар куллю тΙалиб мурид
Душманле бурцанил шайтΙанун марид
Ерхуб гΙялим гΙябид МухΙеммад Саид



ГΙялим хΙевуб ДагъистΙайзе сай гъуна
Жавагьирт духΙна дуциб урхьу гъуна
Гьар гΙяламис шарабла гΙениз гъуна
Ерхуб гΙялим гΙябид МухΙеммад Саид



ГΙилму гΙамаллизе уб цΙакъле машгьур
ТΙалибтеке тΙинтΙ бариб гΙилмула нур
Бахъал гΙялимте барибил сай гъаюр
Ерхуб гΙялим гΙябид МухΙеммад Саид



ГΙуламаунела духΙна уб загьир
Гьар фанну гΙилмулизе уб дахъ магьир
Гьар куллю шайъизе халасил Тагьир
Ерхуб гΙялим гΙябид МухΙеммад Саид



Буциле уркΙилизе варягΙ такьва
Чарбариб набсюл аммаратла гьава
Кеббакъиб абадла жанатуль маъва
Ерхуб гΙялим гΙябид МухΙеммад Саид



Буциле Рассулла хΙукму шаригΙят
Дархьдариб Аллагьла фариза суннат
Бариле Аллагьис халис гΙибадат
Ерхуб гΙялим гΙябид МухΙеммад Саид



Лимзилизе буб балагъат фасахΙят
УркΙилизе буб истикьамат сихΙхΙят
Муъмин халкьизе буруле насихΙят
Ерхуб гΙялим гΙябид МухΙеммад Саид



УркΙилизе артΙиб кашпу карамат
Гиле загьир битΙин гΙилму фирасат
ГΙилму хΙилму гΙякьлу гиб гьарил сифат
Ерхуб гΙялим гΙябид МухΙеммад Саид



Идбагунела варис хΙере ерхуб
Гιилму динла мягΙданра кеберхуб
Зубре мусне дисанил вали егъуб
Ерхуб гΙялим гΙябид МухΙеммад Саид



Дунъя мулк хΙебариб Расулни батуб
ГΙялим вали гΙябид загьид хΙебатуб
Хараба дунъя гьарни гΙелабатуб
Ерхуб гΙялим гΙябид МухΙеммад Саид



ХΙяфиз ХΙежи Губдани сай ил хΙямид
Раббана - гъфирлана Аллагьуль вахΙид
Аллагь гьалжунтезе дараба халид
Ерхуб гΙялим гΙябид МухΙеммад Саид



Ил дусла тарих буле гъашкавлизе
Накьлу уб жамадул аввал базизе
Сакин вара Аллагь сай нигΙматизе
Ерхуб гΙялим гΙябид МухΙеммад Саид